කාලය සහ මරණය ජයගත් දිව්‍යමය සිද්ධස්ථානය

දකුණු ඉන්දියාවේ තමිල්නාඩුවේ කාවේරි නදිය ආශ්‍රිත සශ්‍රීක බිමක පිහිටි තිරුක්කඩයූර් දේවාලය හුදෙක් ආගමික ස්ථානයක් පමණක් නොව, එය මිත්‍යාව සහ යථාර්ථය අතර සිහින් සීමාවක පිහිටි විශ්මයජනක ආධ්‍යාත්මික කේන්ද්‍රස්ථානයකි.දේවාලයේ නම වන 'අම්රිතඝතේස්වරර්' යන්නෙහි අරුත "අමෘතය (අමරණීයත්වය) අඩංගු කළසයෙහි අධිපතියා" යන්නයි. පුරාණ විශ්වාසයන්ට අනුව, දෙවියන් සහ අසුරයන් එක්ව කිරි මුහුද මදන විට ලැබුණු අමෘතය අඩංගු කළසය (කුම්භය) පෘථිවිය මත ස්පර්ශ වූ ස්ථානය මෙය බව පැවසේ. එබැවින් මෙම දේවාලය "අමරණීයත්වයේ දොරටුව" ලෙසින්ද හඳුන්වයි

මෙම දේවාලයේ වඩාත්ම ආකර්ශනීය කතාව වන්නේ ශිව දෙවියන් විසින් යමදෙවයා දමනය කිරීමයි.මෙම ස්ථානයේදී ශිව දෙවියන් විසින් මරණයේ දෙවියා වන 'යම' පරාජය කර, තමන්ගේ බැතිමතෙකු වූ මාර්කණ්ඩේය නමැති තරුණයාගේ දිවි බේරා ගත් බව විශ්වාස කෙරේ. සිය 16 වන වියේදී මරණය පැමිණෙන බව දැනගත් මාර්කණ්ඩේය, ශිව ලිංගය වැළඳගෙන දැඩි ලෙස භාවනා කළේය. ඔහු රැගෙන යාමට පැමිණි යමගේ පාශය ශිව ලිංගයේ පැටලීමත් සමඟම ශිව දෙවියන් පෙනී සිට යමව දණ්ඩනයට ලක් කළ බවත්, මාර්කණ්ඩේය හට සදාකාලික 16 හැවිරිදි තරුණයෙකු ලෙස ජීවත් වීමට වරම් දුන් බවත් පැවසේ.

මෙහි ඇති 'කාලසංහාරමූර්ති' පිළිමය මගින් නිරූපණය වන්නේ යමදෙවයාගේ පපුව මත ශිව දෙවියන් සිය පාදයෙන් පහර දෙන දර්ශනයයි. එයින් සංකේතවත් කරන්නේ භක්තිය ඉදිරියේ කාලය සහ මරණය පවා අසරණ වන බවයි. බැතිමතුන් අදටත් මරණ බියෙන් මිදීමට සහ ආයුෂ අපේක්ෂාවෙන් මෙම පිළිමය වැඳ පුදා ගනී.

මෙම දේවාලයේ වාසය කළ අභිරාමි භට්ටර් නම් භක්තිකයා පිළිබඳව ද ජනප්‍රවාදයේ එයි. ඔහු අභිරාමි දේවිය කෙරෙහි කෙතරම් භක්තියක් දැක්වූවාද යත්, ඔහු රජුගේ නියමයෙන් දැඩි පීඩාවකට පත්වූ අවස්ථාවේදී දේවිය උදෙසා 'අභිරාමි අන්ධාදි' නමැති කාව්‍ය මාලාව රචනා කළේය. අදටත් මෙම කෘතිය දෙමළ සාහිත්‍යයේ ඉතා උසස් අධ්‍යාත්මික කෘතියක් ලෙස සැලකේ.

දිනක් රාජකීය සංචාරයක යෙදුණු රජු, තමා ඉදිරියේ සිටි භට්ටර් දේවියගේ භක්තියේ ගිලී සිටිනු දැක ඔහුව පරීක්ෂාවට ලක් කළේය. "අද රාත්‍රියේ සඳ බබළන්නේ නම් ඔබ සත්‍යවාදියෙකි, එසේ නොමැති නම් දඬුවම් ලැබිය යුතුය" යැයි රජු පැවසීය. (එදින අමාවක දිනයක් විය).බිය නොවූ භට්ටර්, අභිරාමි දේවිය උදෙසා 'අභිරාමි අන්ධාදි' නමැති පද්‍ය මාලාව රචනා කළේය. සෑම පද්‍යයක්ම ගායනා කරන විටම අහසේ ආලෝකය වැඩි වූ අතර, සියවන පද්‍යය නිම වන විට දේවියගේ කනකර ආභරණවලින් නික්මුණු ආලෝකය නිසා අමාවක අහස පුන් පෝය සඳක් සේ බැබළුණු බව සඳහන් වේ. මෙම සාහිත්‍යමය ප්‍රාතිහාර්යය අදටත් එම දේවාලයේ වාතලයේ දෝංකාර දෙන බව බැතිමතුන්ගේ විශ්වාසයයි.

අෂ්ට බන්ධන ලිංගය

මෙම දේවාලයේ ඇති ශිව ලිංගය මතුපිට, යමදෙවයාගේ පාශය (ලනුව) වැදීම නිසා ඇති වූ සලකුණක් අදටත් දැකගත හැකි බව බැතිමතුන් විශ්වාස කරයි. මෙහි පැවැත්වෙන පූජාවන් සුවිශේෂී වන්නේ, දේවාලය තුළ ඇති "අභිරාමි" දේවියගේ රූපය ඉතාමත් ජීවමාන සහ කරුණාබරිත බවක් බැතිමතුන්ට දනවනු ලබන බැවිනි.

අද වන විට මෙය ඉන්දියාවේ පමණක් නොව ලොව පුරා වෙසෙන හින්දු ජනයාගේ ජීවිතයේ ප්‍රධාන සන්ධිස්ථානයක් වී ඇත.

පුද්ගලයෙකුගේ ජීවිතයේ දෙවන භාගය ආරම්භ වන විට, තම ආයුෂ සහ සෞඛ්‍යය නැවත පුනර්ජීවනය කර ගැනීමට බැතිමතුන් දහස් ගණනක් මෙහි පැමිණෙයි.ෂෂ්ටි පූර්ණි නමින් හැඳින්වේ. දැඩි ආතතියෙන් සහ කාර්යබහුලත්වයෙන් පිරුණු වර්තමාන ජීවිතවලට, මෙම දේවාලයේ ඇති නිහඬ සහ ගාම්භීර ස්වභාවය විශාල මානසික සුවයක් ලබා දෙයි.තිරුක්කඩයූර් දේවාලය යනු කාලය, භක්තිය සහ දේවත්වය පිළිබඳ උත්තරීතර සංකේතයකි. ඔබ පර්යේෂකයෙකු ලෙස හෝ සාහිත්‍යයට ලැදි අයෙකු ලෙස මෙම දේවාලය දෙස බලන විට, එහි පවතින්නේ හුදෙක් ගල් කැටයම් නොව, මිනිස් ආත්මය මරණයට එපිටින් ඇති අමරණීයත්වය සොයා ගිය ගමනේ අත්දැකීම් බව ඔබට වැටහෙනු ඇත.


මෙම දේවාලය ද්‍රවිඩ ගෘහ නිර්මාණ ශිල්පයේ විශිෂ්ට නිදසුනකි. චෝල සහ පාණ්ඩ්‍ය රාජවංශයන්ගේ පාලන සමයේදී මෙම දේවාලය සංවර්ධනය වී ඇති බවට සාක්ෂි පවතී. මෙහි ඇති ශිලා ලේඛන සහ මූර්ති කලා නිර්මාණ සියවස් ගණනාවක ආගමික සහ සංස්කෘතික පරිණාමය කියාපායි.


මෙම කෝවිල පිළිබඳ විස්තර පහත දැක්වේ:

ලිපිනය
Sannathi St, Thirukadaiyur, Tamil Nadu 609311, ඉන්දියාව.

විවෘත වේලාවන්

මෙම කෝවිල දිනපතා පෙ.ව. 6.00 සිට ප.ව. 1.00 දක්වා සහ ප.ව. 4.00 සිට ප.ව. 8.30 දක්වා බැතිමතුන් සඳහා විවෘතව පවතී.  ශිව දෙවියන් වෙනුවෙන් කැප වූ මෙම පූජනීය ස්ථානය ඉතාමත් ප්‍රසිද්ධ වන්නේ එහි ඇති අභිරාමි දේවියගේ දේවාලය සහ ඒ හා බැඳුණු අභිරාමි අන්ධාදි (Abirami Anthathi) නම් සාහිත්‍යමය කෘතිය නිසාය. බොහෝ බැතිමතුන් ආයුෂ වර්ධනය කර ගැනීම සඳහා (විශේෂයෙන්ම 60 සහ 80 වැනි උපන්දිනයන්හිදී) කරන විශේෂ පූජාවන් සඳහා මෙම ස්ථානයට පැමිණේ.